Pedro Mapelo
Rhoqo ngelixesha enyakeni, uMasipala wase Chris Hani uququzelela ugqatso lweembaleki(Marathon) ngelikhumbula igqala lomzabalazo nowaye ngusosiba jikelele wamaKomanisi oMzantsi Afrika(SACP), uThembisile Chris Hani. Kule mpelaveki yomhla wamashumi amabini anesihlanu, kwinyanga kaTshazimpuzi eyaziwa njenge nyanga yenkululeko kwilizwe jikelele, iimbaleki ezizobe ziphuma mbombo zone kweli phondo leMpuma Koloni nangaphandle kwayo, zizobe zikhuphisana ngenjongo yokuzibambela indawo yokuqala kwidolophi yaseCofimvaba. Lo mdyarho weembaleki uzakohlulwa-hlulwa ngokushiyana kwemigama ngeemigama nanjengoko kukho nalowo ulungiselelwe amagqala.
Olona gqatso luphambili ngumgama ongamashumi amabini anesihlanu(25-km), abantu abaphume phambili kulona umgama kulindeleke ukuba bagoduke nesityhwentywe semali esiphaya kumashumi amabini anesihlanu amawaka(R25 000), emadodeni nako mama.
Olulandelayo ugqatso ngumgama ophaya kwishumi (10-km), wona lo umgama uhamba nomgodlo wemali okwishumi lamawaka(R10 000) kuphinde kubekho nenkitha yamabhaso ohlukeneyo ekuzobe kuphiswa ngawo.
Ojongene nemicimbi yoqhagamshelwano kulo masipala, uThobeka Mqamelo, uthe amalungiselelo alomsitho aqhuba kakuhle kakhulu kwaye sele behlabele mgama. “Siyilungele ngokupheleleyo le mini inkulu yethu singumasipala wase Chris Hani. Iinjongo zethu kulona unyaka ibikukufumana inani leembaleki ezingamawaka amabini - kodwa ngenxa yomdla oboniswe ngabantu nobukhulu balemidyarho, sesifumene izicelo zabantu abafuna ukuthath'inxaxheba abangaphaya kwamawaka amabini - elona nani besilifuna.
Silindele ukuba u-Athletics SA apha eMpuma Koloni eze nawo onke amaqela eembaleki zakhe ngoMgqibelo”.
UMqamelo, oyinxalenye yabaququzeleli kulo masipala ukwathe, umcimbi uzakuqala ngentsimbi yesithandathu ekuseni ngoMgqibelo kule mpelaveki siya kuyo.
Le midyarho yeembaleki yasungulwa kwiminyaka emithathu edlulileyo kwaye iya ikhula unyaka nonyaka. Ugqatso luzakuqala kwilali eyaziwa ngokuba kuseZigudu uyokuphela kuSabalele, apho kwazalelwa khona uHani.
Lo mgama ucangcatha ngqo kwindlela eyayihamba kuyo le nkokheli yoMkhonto Wesizwe ngethuba isafunda.
Iyonke imali ezakube ikhutshwa ngulo masipala iyonke ngamakhulu amabini amawaka(R200 000).