Sithandiwe Velaphi
Umbutho wemifela-ndawonye yabasebenzi i-Cosatu uthi igalelo legorha lomzabalazo uChris Hani sokuze lilibaleke kwidabi labasebenzi baseMzantsi Afrika.
NgoLwesihlanu bekukhunjulwa umhla wokubhubha kukaChris Hani, owadutyulwa eDawn Park eMpuma Randi ngo1993.
Isithethi esibambeleyo kwi-Cosatu uNtai Norman Mampane uthi uHani liqhawe lomzabalo wabasebenzi. “Namhlanje singabasebenzi sikhululekile kumakhamandela engcinezelo. Yonke lomithetho yayenzelwe ukukhoboza abasebenzi ayisekho ngoku,” utshilo uMampane.
UMampane ubongoze abasebenzi ukuba babhiyoze kulenyanga bekhumbula igalelo likaHani kumzabalazo. “Uqabane uHani waye yinkokheli eyayisekezelwe kwi-demokhrasi. Wayekholelwa ukuba xa umbutho ethabathe isigqibo malunga nento ethile, onke amalungu afuneka alandele oko,” utshilo uMampane.
UMongameli uJacob Zuma utyhile ngokusesikweni ilitye elikwifihlo likaHani eBoksburg ngoLwesihlanu. Ku lo msitho obukwazinyaswe ngumhlolokazi kaHani uLimpho, uZuma utyibeke lokaHani esithi igalelo lakhe kumzabalazo waseMzantsi Afrika.
Inyanga kaTshazimpuzi yaziwa njengenyanga kaChris Hani kuMasipala waseKurhuleni eRhawutini. Kwankqu noMasipala waseChris Hani, apho lazalelwa khona eliqhawe lasemaTshonyaneni, uthe gqolo ukubekela bucala le nyanga njengenyanga kaChris Hani.
Ngomhla wamashumi amabini anesihlanu (25) kulenyanga, uMasipala waseChris Hani uzakube esindleke umsitho weembaleki iChris Hani Freedom Marathon (25km) kuSabalele. USodolophu waseChris Hani uMxolisi Koyo uthi babekele bucala imali engange R200 000 kuye nawuphi na umntu ozakuphumelela umdyarho lowo.
“Lo mdyarho we-25km uluphawo lomgama owawuhanjwa nguHani xa esiya esikolweni,” utshilo uKoyo.