UShepherd Bushiri uthi akazukubuyela eMzantsi Afrika yena.
Image: Dimpho Maja/Independent Media
Umprofeti waseMalawi uShepherd 'Papa' Bushiri uvakalise inkxaso kumfundisi waseNigeria uTimothy Omotoso emva kokuba efunyaniswe engenatyala kwityala elingundabamlonyeni, watsho esithi akazukubuyela eMzantsi Afrika ukuya kujongana nezityholo atyatyekwa zona.
INkundla ePhakamileyo yaseGqeberha ithe akanatyala uOmotoso (63) kunye nabo atyholwa nabo uLusanda Sulani (41) noZikiswa Sitho (33) emva kokuba eli tyala lirhuqe iminyaka esibhozo.
UJaji uIrma Schoeman ugwebe ngelithi umbuso usilele ukubonisa ukuba abamangalelwa banetyala.
Ngelixa eli tyala lalinobungqina obubambekayo obenziwa ngabamangali, ubungqina betyala lilonke bufunyanwe bunganelanga.
IJaji ikwagxeke umtshutshisi ngokungabinabuchule bokubuza imibuzo.
Ethetha ngo-Omotoso ofunyenwe engenatyala, uBushiri ubhale kwikhasi lakhe lonxibelelwano, evakalisa inkxaso yakhe kulo mfundisi.
"Emva kweminyaka esibhozo ebuhlungu, iminyaka engathi bubusuku obungapheliyo – uTimothy Omotoso, umfundisi owazalelwa eNigeria, ubhengezwe njengomsulwa," ubhale watsho kuFacebook.
"INkundla ePhakamileyo yoMzantsi Afrika imfumanise engenatyala kuwo onke amatyala ayi32 ebejongene nawo, aquka ukudlwengula, ukuxhaphaza ngokwesondo, ukurhwaphiliza imali, ukuthubelezisa abantu, kunye nezenzo zolwaphulomthetho ezikhokelela ekufumaneni inzuzo. Khawufan' ucinge: i32 yonke!"
UBushiri uzigxekile izityholo ebezibekwe uOmotoso, esithi ziziswe kuye ngokungekho sikweni.
Ukwakugxekile ukwalelwa ibheyile kunye nempatho uOmotoso ebejongene nayo ngalo lonke ixesha lokuchotshelwa kwetyala.
"Kwiminyaka esibhozo, ebevuka esesiseleni esibandayo, ajamelane needonga ezinye, ephelelwe lithemba, ecinga ukuba ihlabathi limlibele," utshilo uBushiri.
Ethelekisa imeko yakhe nekaOmotoso, uBushiri, owabaleka eMzantsi Afrika ngo2020 ngelixa ejongene nezityholo zobuqhophololo nokukurhwaphiliza imali, uchaze le meko "njengentuthumbo" kwaye wathi abasemagunyeni bafuna ukumophula.
"Babefuna nditshixelwe kulahlwe isitshixo, ndilityalwe, igama lam lirhuqwe eludakeni de kungabikho nto iseleyo kum ndibe sisiporho," wongeze watsho.
UBushiri ukwathethe ngedabi eliqhubekayo enkundleni elimalunga nokubuyiselwa kwakhe eMzantsi Afrika.
Kwinyanga ephelileyo, i-IOL News inike ingxelo yokuba iNkundla kaMantyi oyiNtloko eMalawi yayalela ukuba uBushiri nenkosikazi yakhe uMary bathunyelwe eMzantsi Afrika ukuze bajongane nezityholo eziquka ukudlwengula, ukwaphula imiqathango yebheyile, kunye nokwaphulwa kwemithetho eyahlukeneyo yemali neyabaphambukeli.
"Yiyo loo nto ndingafuni ukubuyela. Yiyo loo nto ndingafuni ukuthunyelwa eMzantsi Afrika – kuba ndiyayazi into endilindileyo apho. Inkqubo yobuqhophololo. Isiphelo esele simiselwe," utshilo uBushiri.
"Kwinyanga ephelileyo, inkundla yaseMalawi yandimangalela ngezityholo ezilishumi – ubuqhophololo, ukurhwaphiliza imali, izenzo zolwaphulomthetho ezikhokelela ekufumaneni inzuzo — izinto ezifunwa nguMzantsi Afrika ukuba ndiziphendule. Ndothukile kungekho mntu uthetha ngalento."
UBushiri ukwathethe ngezityholo zokudlwengula nokungaveli enkundleni emva kokufumana ibheyile, nabange ngelithi ezi zityholo zavela emva kokuba eye kufuna ukhuseleko eMalawi.
Utyhola abasemagunyeni boMzantsi Afrika ngokufuna ukophula yena nenkosikazi yakhe.
"Wenze ntoni embi, kanti umntanam wone ntoni kangaka ade angavunyelwa ukungeniswa esibhedlele ngabomthetho eMzantsi Afrika de waphulukana nobomi bakhe?" utshilo.
UBushiri ucebise uOmotoso ukuba awushiye uMzantsi Afrika ngoko nangoko.
"Mntakwethu Omotoso ndiyaqonda uzogxothwa kwela lizwe ngoko nangoko. Nceda, ngeenyembezi emehlweni am, uhambe. Hamba ngoku usenako, ukuba kukho ifestile onokuthi uphume ngayo ngokukhawuleza phambi kokuba bakugxothe, yenze njalo," utshilo uBushiri.